Llesiant Delta yn ennill dwy wobr a chanmoliaeth yng Ngwobrau Gofal Prydain - rhanbarth Cymru

Mae Llesiant Delta wedi ennill dwy wobr anhygoel a chanmoliaeth uchel yn rhanbarth Cymru o Wobrau Gofal Prydain gan dynnu sylw at ei ymrwymiad i ddarparu gofal tosturiol, sy'n canolbwyntio ar yr unigolyn ac wrth ddatblygu gweithlu ymroddedig a medrus iawn sy'n darparu gwasanaeth rhagorol.

Mae'r cwmni, sy'n darparu technoleg gynorthwyol a monitro rhagweithiol i gefnogi pobl hŷn ac agored i niwed i fyw yn fwy annibynnol, wedi ennill y gwobrau Urddas mewn Gofal a Datblygu'r Gweithlu.

Cafodd y swyddogion ymateb cymunedol Mark Burt a Nadine Rees ill dau eu henwebu ar gyfer y Wobr Gweithiwr Gofal Cartref, gyda Mark yn cael canmoliaeth uchel am ei wasanaeth eithriadol.

Dywedodd y beirniaid: “Mae’r tîm yn dangos y pwysigrwydd o hyrwyddo urddas mewn gwasanaeth, gan roi’r defnyddiwr gwasanaeth wrth wraidd pob penderfyniad. Mae ymrwymiad y tîm i ofal sy’n canolbwyntio ar yr unigolyn yn sicrhau parch ac ystyriaeth o anghenion unigol. Daliwch ati gyda’r gwaith rhagorol gan barhau i arwain drwy esiampl wrth ddarparu gofal tosturiol gyda pharch.”

Mae'r gwobrau'n dathlu rhagoriaeth ar draws holl feysydd y sector gofal cymdeithasol gan gydnabod gwaith staff rheng flaen megis gweithwyr gofal a rheolwyr gofal, a'r bobl hynny sydd wedi cael dylanwad mewn ffyrdd eraill megis hyfforddiant ac arloesi.

Meddai Mark: "Mae'r wobr hon yn dyst i'r safonau uchel y mae pob un ohonom yn Llesiant Delta yn gosod i ni ein hunain.  Ni allwn fod wedi cyflawni hyn heb gefnogaeth fy nghydweithwyr ymateb cymunedol, yr ymgynghorwyr a phawb rwy'n gweithio gyda nhw. Diolch yn fawr.”

Mae Llesiant Delta, Cwmni Masnachu Awdurdod Lleol sy'n eiddo i Gyngor Sir Caerfyrddin, yn darparu gwasanaeth ymateb cymunedol 24 awr ar gyfer gofal cartref brys a chymorth gofal cymdeithasol. Mae'r gwasanaeth yn helpu preswylwyr i osgoi derbyniadau diangen i'r ysbyty, yn cefnogi byw'n annibynnol, ac yn cynorthwyo cleifion i fynd adref o'r ysbyty hyd nes bod gofal ailalluogi neu ofal hirdymor ar waith. 

Dywedodd y Cynghorydd Jane Tremlett, Aelod Cabinet Cyngor Sir Caerfyrddin dros Iechyd a Gwasanaethau Cymdeithasol: “Mae Llesiant Delta yn darparu gwasanaeth ymateb llesiant cymunedol brys 24 awr sydd wedi tyfu'n sylweddol, gan ddyblu ei weithlu a chreu mwy o gyfleoedd i'r tîm ddatblygu a symud ymlaen o fewn y sector. Mae gofal, hyblygrwydd a chynaliadwyedd o ansawdd wrth wraidd y gwasanaeth, gan ymgorffori arferion gorau ym mhob agwedd ar gyflawni, a sicrhau safonau uchel o ofal diogel sy'n canolbwyntio ar yr unigolyn. 

"Gan weithio'n agos gyda gwasanaethau cymdeithasol a'r bwrdd iechyd, mae Llesiant Delta yn sicrhau bod preswylwyr yn cael y gofal sydd ei angen arnynt gartref, gan leihau derbyniadau diangen i'r ysbyty a darparu canlyniadau gwell i bawb.

“Llongyfarchiadau mawr i'r tîm cyfan am ennill y gwobrau mawreddog hyn, ac i Mark a Nadine am gael eu cydnabod am eu hymrwymiad pendant i wella bywydau ein trigolion mwyaf agored i niwed."

Bydd Llesiant Delta nawr yn mynd ymlaen i'r rowndiau terfynol cenedlaethol sy'n cael eu cynnal yn yr ICC yn Birmingham ym mis Mawrth 2025.